වාලුකා නිශාවන් 2 | Arabian nights 2

පොසොන් හඳ පායලා බැහැලා ගිහින්, පෝයට අලුත්ගම තිබ්බ ආලෝක පුජා සහ ප්‍රාණ ඝාතන පුජා ඉවර වුනාට පස්සේ  තිබුනේ අඳුරු රෑ අහසක්. ආර්ද්‍රතාව අඩු පැහැදිලි අහසක්. රාත්‍රී අහස පින්තුර ගන්න කියාපු කාලේ. දවල් කාලේ පින්තුර ගන්නවා තියා එලියට බහින්න බැරි නිසා, රාමදාන් තනි තරුවයි හඳ පලුවයි බටහිර අහසේ මතු වෙනකල් රාත්‍රී කාල වල මං අලුත් සගයා 'සුවා' එක්ක වටේ පිටේ කරක් ගැහුවා කැමරා දෙකත් අරගෙන. හඳ ආයෙත් අහසට ගොඩ උනාම ඉතින් තරු නොපෙනී යන නිසා ඔය වැඩේ කරන්න බෑ නේ. සුවාට තාරකා පථ (STAR TRAILS) ගන්න විදිහ කියල දෙන අතරේ ඇල්ලුවා පින්තුර ටිකක්. වැඩිමනක්ම තාරකා පථ තමයි. 

ඒ වගේම මේ දවස්වල ක්ෂිරපථය රෑ අහසේ මතුවෙන්න පටන් ගත්තත් එකම එක පින්තුරයක විතරයි ඒක යන්තමින් සටහන් කර ගන්න ලැබුනේ. ආලෝක දුෂණය නිසා වැඩිය පැහැදිලි නැති ඒ පින්තුරෙත් ගන්න ලැබුනේ අහම්බෙන්. පින්තුර ගන්න කියල රෑ අටට විතර පිටත් උන අපි නිකමට වගේ ගොවිපලට ගොඩ උන අතරේ හදිසි ශල්‍යකර්මයකට හිර වෙන්න උනා පැය ගානකට. අවසානේ හොදටම හෙම්බත් වෙලා ආපහු යන ගමන් නිකමට වගේ වාහනේ නතර කරලා පින්තුරයක් ගන්න උත්සහ කරන්න තීරණය කළා. ඒකෙ ප්‍රතිපලය තමයි අවසාන පින්තුරය. 

හුදෙකලාව මකන තරු 

තරු එකතු කරන ටැංකියක් 

මගදී බැටරිය බැස්ස නිසා අස්සර්තක උන පින්තුරයක් 

හෙම්බත්වෙලා එන ගමන් මග නතර උන අපේ ගමන් සගයා 

ඔබත් ඔහොම ඔතන ඉන්න- මමත් මෙහෙම මෙතන ඉන්නවා
ක්ෂිරපතය 

මාර්තුවේ තරු ගමන - star trails

පොලරිස් හෙවත් උතුරු තරුව වටේ 

මාර්තු මාසේ ඉවර වෙන්නත් ඇවිත්. මං එකම එක පෝස්ට් එකයි පල කරල තියෙන්නෙ මේ මාසෙට. අපොයි වෙච්ච දෙයක්. එක අතකට එහෙම නොවුන නම් තමයි පුදුමේ. මේ මාසේ මුල ඉදලම අන්තර්ජාල සම්බන්දතාව ලෙඩ දුන්නා. ගෙවිච්ච දවස් 25න් 7ක් විතර තමයි ජාල සබදතාව  තිබුනෙ අපට. ඉදල හිටල ජංගමෙන් ඇවිත් බ්ලොග් කියවලා ගියාට මොකද පෝස්ට් එකක් දාන්න විදිහක් තිබුනෙ නෑ. මේ පෝස්ට් එකත් කොටන්නෙ ජංගමේ ජාල සම්බන්තාවෙන් උඩුගත කරන්න හිතාගෙන. වැඩිය නෑ. මේ සැරේ පින්තූර 2ක් විතරයි. මේ තාරකාවල ගමන් මඟ හෙවත් star trails. කලිනුත් පරණ star trail කිහිපයක් පල කළා මං. 

පිංතුර 2ක් උනාට මේ දවස් කිහිපයක මහන්සිය. හඳ නැති, වලාකුළු වලින් බාධාවක් නැති රැයක් හොයා ගන්න එක, වැඩේට හරියන කලුවර, ආලෝක දූෂණය අවම තැනක් හොයා ගන්න එක, දවල් කාලෙක තැනට ගිහින් composition එක ගැන අදහසක් ගන්න එක ආදී  එකී නොකී මෙකී වැඩ ගානක් කරන්න ඕන මේ පින්තූරයක් ගන්න කලින්. ඊට පස්සෙ අදාල රෑ කැමරාව ත්‍රිපාදෙ ගහලා, දුරස්ත පාලකයක් හරහා එක දිගට පැයක් විතර පින්තුර ගන්න එකත් එපා වෙන වැඩක්. තට්ට තනියම පාලු තැනකට වෙලා කට්ට කලුවරේ පැය ගානක් ඉන්න ගියාම එපා වෙනවනෙ. ඒ හින්දම මං මේ පිංතූර ගැනිල්ලට යොදන උපරිම කාලය පැයයි. වැඩි කාලයක් ගත්ත නම් වඩා ලස්සන පිංතූරයක් ලබා ගන්න පුලුවන් අන්තිමේදී.

ඇත්තටම මොනවද මේ පින්තුර? සරලවම කියනවා නම් මේකයි. පෘතුවිය තමන් වටේට කරකැවෙනවලු නේ. ඒ නිසා ඉර නැගෙනහිරින් නැගලා බටහිරින් බැහැල යනවා වගේ අපට පේනවා. අපට ලගින්ම තියෙන තරුව වෙච්ච ඉර වගේම ඈතින් තියෙන අනිත් තරුත් ඒ විදිහටම නැගෙනහිරින් පායලා බටහිරින් බැහැල යනවා. ඒ කියන්නේ ඉර වගේම තරුත් ඉතාම හිමින් අහසේ ගමන් කරනවා. පියවි ඇහැට නොපෙනෙන මේ තරු වල ගමන තමයි මේ පින්තුරේ සටහන් වෙලා තියෙන්නේ. කැමරාවේ ෂටරය දීර්ඝ කාලයක් ඇරලා තියලා මේ තරු වල ගමන සටහන් කර ගන්න එක තමයි මේ වගේ පින්තුරයක් ගැනීමේදී කරන්නේ. කැමරාව ත්‍රිපාදයක නොසෙල්වී තියල තත්පර 30ක් ෂටරය ඇරලා තිබ්බම, තිතකට වඩා ටිකක් දිගටි රේඛා ස්වරුපයෙන් තමයි තරුවක් සටහන් වෙන්නේ. ඒ වගේ එකදිගට පින්තුර ගණනාවක් අරන් ඒවා ඇඩෝබිගේ පින්තුර කඩේ (Adobe Photoshop) පිහිටෙන් එක මත එක ගොඩ ගහල  (Stack) තමයි මම මේ තරු වල ගමන් මාර්ග සටහන් කර ගත්තේ.  
උඩ තියෙන පින්තුරය උතුරු දිශාවට එල්ල කරලා ගත්තු එකක්. සමකයට ඉහලින් තියෙන රටක ඉන්න නිසයි මේ උතුරු තරුව වටේ ගමන් කරන දර්ශනේ සටහන් කර ගන්න ලැබුනේ මට. පහල පින්තුරය දකුණු අහස දිහාට කැමරාව එල්ල කරපු එකේ ප්‍රතිපලයක්. මේ වගේ පින්තුර කිහිපයකට තැන් අවට කාන්තාරයේ හොයාගෙන තිබුනත් වලාකුළු පිරිච්ච අහසයි, අපිව රවට්ටන්න වගේ හිටපු ගමන් වැටෙන වැහි බින්දු දෙක තුනයි හරියට බාධා කරනවා. නැත්නම් මේ පොස්ට් එකට තව පින්තුර 3ක් වත් අඩුම තරමින් එකතු කරන්න තිබුනා. 

ප. ස. 
කලින් පොස්ටුවේ සවුදි කටාර් ගැටලුව ගැන ලියන්න කියල ඉවාන් සහ චන්දන කරපු ඉල්ලීම නිසා මං ඒ ගැන මෙතන ලිව්වා. මේ බ්ලොගේ  පින්තුර වලටම ප්‍රමුඛතාව දෙන නිසයි මේකේ ඒ ගැන ලොකු විස්තරයක් නොලිව්වේ. 

ඇවිදින තරු - star trail

රෑ අහසේ පින්තුර ගන්න එක මම ගොඩක් ආස දෙයක්. ගොඩ කාලෙකට පස්සේ star trail එකක් කරන්න හිතුන. එත් පෙරේද රැ එලියට ගිහින් බලනකොට හද නිකන් දැකැත්තක් වගේ අහසේ තියෙනවා. හදත් එක්ක මේ කෙරුවාව කරන්න බැරි උනත් කෝකටත් කියල කැමරාව අරන් එලියට ගිහින් පොඩි අත්හදා බැලීම් දෙක තුනක් කරලා බැලුව.
අන්තිමට හොදයි කියල හිතුනු තැනක් අල්ලාගෙන වැඩේ පටන් ගත්තත් ටික වෙලාවකින් කැමරාවේ බැටරිය බැස්ස නිසා වැඩේ දෙල් උනා. ඊට පස්සේ ඊයේ රෑ හොදට සුදානම් වෙලා ගිහින් ටිකක් විතර සාර්ථක පින්තුරයක් අරන් ආවා. පින්තුරයක් කීවට මේක පින්තුර ගොඩක් එකතු කරලා හදපු එකක්.  පැය 2ක් විතර සීතලේ ගැහි ගැහි ඉදල තමයි මේක ගත්තේ.
යටින් තියෙන්නේ කලින් දවසේ අසාර්ථක වෙච්ච එක .

Star trails + Light trails
©wmcwickramasinghe|2013

මේ කලින් දවසේ මගදී නැවතුනු එක. එකත් එච්චරම අසාර්ථකත් නැද්ද මන්ද. තව ටික දවසකින් හද පායන එක පරක්කු වෙන්න පටන් ගත්තම මේ පින්තුරේ ආයෙත් ගන්න උත්සහ කරන්නයි හිතන් ඉන්නේ.

©wmcwickramasinghe|2013

ඒ ගමන්ම පරණ ඒවා දෙකකුත් දාන්න හිතුන.

©wmcwickramasinghe|2013

උතුරු තරුව වටේ කරකැවෙන තරු
©wmcwickramasinghe|2013